|
|
|
 |
|
 |
||||||||
|
||||||||||
 |
 |
 |
||||||||
| ملتقى أصحاب نوبات الهلع ملتقى جميع الإخوه الذين يعانون من نوبات الهلع ، وتجاربهم بهذا الخصوص |
 |
|
|
أدوات الموضوع |
02-11-2014, 09:17 PM
|
#1 | ||||
|
عضو نشط
اعوذ بالله من الشيطان الرجيم
|
تجربتي الخاصة مع الهلع
السلام عليكم كيف الاحوال اليوم جبتلكم قصة جميلة يحكيها شخص مصاب بالهلع
بدأت هالرحلة المزعجة في ليلة العيد السنة الي راحت كانت يومها متوتر من شي بس ما ادري وش هو....؟ (طبعا في رمضان ما كنت اكل زين وكنت ما اشتهي اكل مرة. وان اكلت يادوب اشرب لي شوربة مع حبة سمبوسة الين وقت السحور. طبعا انا قاعد اذكر لكم احد اهم العوامل الي تساهم في زيادة القلق والتوتر الي هي قلة الاكل.... بالاضافة الى اني مدخن واشرب قهوة على معدة فاضية ) نجي لليلة العيد كان وضعي طبيعي ما فيني الا العافية وشوي حسيت بتنميل بيدي بعدها تنميل في الوجه قلت في نفسي وش السالفة ؟؟؟ رحت المستوصف الي جنب بيتي وقابلت دكتور الطورائ كان شاك اني متعاطي حشيش والعياذ بالله... قلت لا والله ما استخدمت شي قام قال لي لازم تروح للمستشفى. انا وقتها خفت قامت الهواجيس تشتغل براسي كنت رايح انا وولد عمتي, واحنا في السيارة حسيت بضيق في النفس و ضعف في الاطراف وخفقان في القلب. اول ما وصلنا للمستشفى نزلت بسرعة وتوجهت الى احد الاسرة وفجأة..............! بدأ لساني يثقل وزغللة في العين وبدات اتشنج وفعلا تشنجت عليهم في المستشفى انا قلت في نفسي بس هذي اكيد جلطة. وضعوا لي الاكسجين وجا الدكتور بكل برود وقالي اعترف مين الي تحبها عشان تسوي فيك كذا انا وقتها مع اني تعبان بغيت اقوم واصفقه... تستهبل يادكتور شفت الموت قبل شوي وتقولي من تحب....؟؟؟؟ طبعا كل الي سوه فيني انهم عطوني حبة فاليوم وقالو لي هذا نيتجة الارهاق والتعب والتدخين والقهوة وعدم الاكل.... رجعت البيت ونمت وما عيدت مع الناس في الصبح لكن الحمد لله على كل حال. بس هاذي مو نهاية الموضوع راح اكمل لكم بعدين وش صار........................ طبعا مثل ماقلت كانت هذي اول تجربة لي مع نوبة الهلع...صحيت اليوم الي بعده وانا زي الفل ولا كأنه صار لي شي وواصلت حياتي بشكل طبيعي. مرت الايام وجات بداية الدراسة... كنت متحمس على غير عادتي والسبب انه هذي السنة هي اول سنة لي بالتخصص الي هو محاسبة بداية المستوى ((الترم)) كان الوضع حلو 4 مواد وسهلة وكلها مبادئ و اساسيات وكنت مجتهد وبنفس الوقت كنت اخذ على اعلى الدرجات في القروب حقنا. كنت الحياة حلوة وماشية بشكل جميل وسلس كانت ماشي صح بدراستي ووضعي في البيت ممتاز ومرتاخ من جميع النواحي. لكن يوم من الايام........ ...((كانت الساعة 03:00 عصر)) راجع من الجامعة سمعت فيه خبر شين عن وفاة شخص بين وبينه علاقة صداقة وفجأة بدا يجيني خوف وقلت في نفسي هذا الخبر ما هو صحيح لكن بديت افكر في موضوع هذا الشخص طوال اليوم . والي كان مخوفني مهو (فقدان هذا الشخص) الفكرة المزعجة الي كانت تدور في بالي انه انا كنت اخر جزء من حياته عموما وصلت البيت الساعة 04:00 قلت في نفسي خليني انام يمكن انسى الموضوع وفعلا نمت لكن صحيت الساعة 12:00 بالليل وكنت وقتها جائع قمت غسلت وجبتلي اكل واتذكر اني كثرت الاكل. بعدها جلست غرفتي وشغلت الاب توب وقعدت اتصفح و اقرأ وقتها كنت ناسي موضوع ذاك الشخص لكن على اذان الفجر تذكرت وقام الشيطان يلعب بي وحسيت انه انا السبب في وفاته ....اذكر اني هذيك الليلة دخنت بشكل فضيع سجارة وراى سجارة. بعدها قررت اني ارروح الدوام مواصل, رحت تحممت بعده لبست وشغلت سيارتي ومريت دانكن علشان اخذ قهوتي المعتادة ((واحد مديم بلاك)) وصلت الجامعة وقفت في المواقف.دخلت القاعة................................ المحاظرة الاولى كانت مدتها ساعة ((من اطوال الساعات في حياتي)) كان مشغول بالي مرة منيب قادر اركز وكل شوي امسك كاس القهوة واخذ لي رشفة وفجأة............................!!!!!!! حسيت بخقان قوي حسيت ان قلبي بيطلع من مكانه. وحرارة وتعرق قمت رفعت يدي وقلت دكتوووووووووور واشرت بيدي اني ابغى اطلع . طلعت من القاعة وانا خايف قلت واش اسوي الحين تذكرت انه في عندنا عيادة في الدور الارضي وانا وقتها كنت في الدور الثالث المصاعد بعيدة عني وانا خلص احس اني راح اتشنج نفس الي صار لي بيوم العيد لكن هنا الوضع مختلف ما معاي احد وانا ماني في مستشفى. قمت استعنت بالله وتعوذت من الشيطان ونزلت للطبيب يوم وصلت لقيت طلاب قاعدين في الانتظار قلت يا عمي انا ما فيني صبر مااقدر على طول دخلت للدكتور وقلت له الحق علي يادكتور احس خفقان قوي على طول قالي هدي اعصابك و قلي انت ايش مستخدم حبوب منشطة, ولا حشيش قلت له لا....لا! يادكتور انا ما لي في الاشياء هذي سوى لي تخطيط قلب وقال لي والله قلبك سليم و انت مافيك شي الي فيك خوف وتوتر روح البيت ارتاح وان شاء لله راح تخف............ طبعا سمعت كلامه وقررت اني اسحب على المحاظرات الي علي واروح البيت نزلت للمواقف وركبت سيارتي... اول ما طلعت على الشارع العام جاني خدر غير طبيعي في يدي قلت بغيت اصدم مليون مرة لكن الحمد لله ربكم ستر علي مع ان طريق رجعت من الجامعة للبيت ما يخذ وقت ان كثرت 15 دقيقة لكن هالمرة غير .......ما ادري اركز على السواقة ولا على الافلام الي قاعدة تصير في جسمي يدي خدرت ..فمي ثقل شوي احس بحرارة شوي احس ببرودة قلبي يبغى يطلع من مكانه ما صدقت على الله اني اوصل للبيت ....و الحمد لله فرجت. اول ما وصلت البيت توجهت الى غرفتي وجلست افكر بالي صار لي في الجامعة ( بيني وبينكم انا ما كنت اعرف شيء اسمه نوبات هلع) فهذا الي زاد الطين بلة ويقول المثل (اذا عرف السبب بطل العجب! ) كنت خايف مرة وحسيت اني راح اموت اليوم تعوعذت من الشيطان الرجيم وصليت لي ركعتين ونمت, لكن اول ما صحيت حسيت انه قلبي راح يطلع من مكانه نبض قوي حيل, (قلت وش السالفة يوم كنت المستشفى جتني النوبة وراحت بنفس اليوم  لكن هالمره غير استمرت معي طبعا على طول رحت المستشفى طوارئجاني الدكتور وقالي ما فيك الا العافية روح البيت ارتاح, طبعا انا رجعت البيت لكن ما ارتحت حاولت انام ما قدرت, حاولت اكل ما قدرت ,حاولت اتفرج على التلفزيون ما قدرت !!!! من بعدها ونوبة الهلع لازم تجيني في اليوم 4 الى 6 مرات في اليوم كانت فترة اختبارات نهائية وانا كنت خايف اني ارسب طبعا ما ذكرت ولا مادة لكن الي ساعدني بعد توفيق الله سبحانه هو اني كنت شاد حالي بداية الترم واغلب المواد فهمها صح الحمد لله عديت الترم بمعدل حلو....... لكن برضوا ما ارتحت في مشكله عندي لازم احلها ((لنوبات الي تجيني وش حلها ؟؟؟)) طبعا ما اخفيكم اني اصبت بأكتئاب واصبحت ما اهتم بالحياة لأنه تعبت من القلق والخوف الي بدون سبب غير نوبات الهلع الي كنت اصبح وامسي عليها....... بداية الترم الثاني كانت صعبه لاني كنت محطم نفسيا ودخلت الترم وانا مو مستعد له هذا غير انه الترم صعب اول اسبوع كنت اغيب كثير حاولت اضغط على نفسي بس ما قدرت اتحمل كل ما دخلت القاعه احس اني مخنوق وفي كتمة بصدري وخفقان في قلبي احاول اني اهرب بس وين اروح هالاعراض معي في كل مكان ....... جلست على هذه الحالة قرابت الشهرين المتتالية لا اكلم احد واطلع مع احد بس جالس بغرفتي منعزل عن هالعالم استنى النوم يجيني ((ما كنت ارتاح الا لمن انام)) يتبع....... المصدر: نفساني
|
||||
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
